Gazteen artean sormena sustatzeko egonaldia antolatuko dute apirilean

“Gazte sortegiak, sormena bizitzeko laborategia”n bertsolartiza, musika, antzerkia eta ikus-entzunezkoa landuko dute

Gazteen artean sormena sustatzeko egonaldia izango da “Gazte Sortegiak, sormen laborategia” ekimena. Pazko-astean bost eguneko sormen egonaldia izango da, 14-18 urte bitarteko gazteei zuzenduta. Arabako lau sortzaileren eskutik bertsolaritza, antzerkia, musika eta ikus-entzunezkoen sortegiak egingo dira, Kanpezuko Ibernalo Aterpetxean.

Lagun artean sormena bizitzea, gazte sortzaileen sarea elikatzea eta euskararen erabileran eta gaitasunean eragitea bilatzen du. Horretarako Pazko-astean, apirilaren 3tik 7ra, 5 eguneko sormen egonaldia egingo da Kanpezuko Ibernalo landetxean.

Egonaldiko egun bakoitzean sortegi bat landuko da, lau guztira: bertsolaritza, musika, antzerkia eta ikus-entzunezkoak. Oihane Perea Arabako Bertsolari Txapelketako txapeldunak gidatuko du “Bertsoa jolas” izeneko sortegia. Bertan ahozko kultur sorkuntzen adierazpide ezberdinen lanketa egingo du. Jon Basaguren musikari eta esatariak letradun musika landuko du “Musikaz egin” izenpean. Unai Lopez de Armentia antzerkilaria eta Baratza aretoko arduradunak berriz antzerki teknikak landuko ditu “Antzerki–aterki” izeneko laborategian. Maider Oleaga zuzendari eta gidoilariak ikus-entzunezkoak izango ditu langai “Zer daki begiak soinuez?” galderaren testuinguruan.

Egitasmoa Oihaneder Euskararen Etxea, GEU elkartea, Arabako Bertsozale Elkartea, Mintzola Ahozko Lantegia, Topagunea eta Arabagara elkarteen lankidetzaren emaitza da.

Izen-ematea

Izen ematea martxoaren 11ra arte egongo da irekia. 14-18 urte bitarteko 20 gaztek hartu ahalko dute parte egonaldian 100 € ordainduta. Interesdunek martxoaren 11 baino lehen eman beharko dute izena Oihanederren webgunearen (www.oihaneder.eus) edo sortegiak@oihaneder.eus emailaren bitartez, euren izen-abizenak, jaiotze data, ikastetxea eta kontakturako telefonoa eta emaila zehaztuz. Izen-emate hurrenkera errespetatuko da.

Egonaldiaren ostean, 2018-2019 ikasturtean, sormen eskola abiatuko da Oihaneder Euskararen Etxean. Eskolaz kanpoko ekintza bezala planteatuta, astean behineko saioetan antolatuko da. Eskolen inguruko informazioa aurrerago zabalduko da.

Deja un comentario

Tu dirección de correo electrónico no será publicada. Los campos obligatorios están marcados con *